Fréttir úr Kópavoginum

Kæru Kópavogsbúar

Á bæjarstjórnarfundi 23. september voru eftirfarandi mál einkum rædd fyrir utan smærri mál.  (Útvarp frá fundum bæjarstjórnar er á fm 98,3 og eru reglulegir fundir annan og fjórða þriðjudag hvers mánaðar og hefjast kl. 4.  Upptökur frá bæjarstjórnarfundum eru á heimasíðu bæjarins og getur verið ágætis skemmtun að hlusta á einn og einn fund t.d. við prjónaskap eða eldamennsku)

Leikskólamál:
Meirihlutinn hefur ákveðið að bjóða út rekstur nýs leikskóla við Aðalþing.  Fulltrúar Samfylkingarinnar í leikskólanefnd lögðust gegn þessari tillögu ásamt fulltrúa foreldra á þeim forsendum að byggingin sé hönnuð eftir leiðbeiningum leikskólafulltrúa. M.a. er tekið mið af þeim athugasemdum sem starfsmenn og foreldrar hafa gert við þær leikskólabyggingar sem hafa verið byggðar í bænum síðustu árin.  Bæjarfulltrúar Samfylkingarinnar töldu einnig að það væri mikilvægt að nýr leikskóli væri rekin af Kópavogsbæ sérstaklega í ljósi þess óstöðugleika sem verið hefur í leikskólamálum í Vatnsendanum síðustu misserin.  Það tekur tíma fyrir nýja leikskóla að festa sig í sessi og er starfsmannavelta yfirleitt meiri á nýjum leikskólum.  Af fenginni reynslu ætti bærinn að reka nýja leikskóla amk. fyrstu árin.

Málefni Goldfinger:
Enn einu sinni eru málefni næturklúbbsins Goldfinger til umræðu í bæjarstjórn.  Sem kunnugt er lagðist lögreglustjórinn á höfuðborgarsvæðinu gegn því að sýslumaður endurnýjaði rekstrarleyfi Goldfinger og lagðist gegn því að þar færi fram nektardans m.a. með þeim rökum að oftlega sé starfsemi nektardansstaða tengd vændi og jafnvel mansali.  Ný lög frá 2007 banna nektardans en í þeim er undanþáguákvæði sem þýðir að rekstraraðilar nektarstaða geta sótt um undanþágu frá þessu banni að fenginni jákvæðri umsögn umsagnaraðila.  Dómsmálaráðuneytið vísaði umsögn lögreglustjóra til föðurhúsanna og taldi engin sannarleg rök gegn því að leggjast gegn því að veita Goldfinger undanþágu frá lögunum.
Í kjölfar þessa úrskurðar dómsmálaráðuneytisins ákvað meirihluti borgarstjórnar að heimila rekstur tveggja nektardansstaða í Reykjavík en hvatti alþingi til þess að skýra lögin og taka af allan vafa varðandi túlkunn þeirra.  Meirihlutinn i Kópavogi ákvað á svipuðum forsendum að leggjast ekki gegn því að sýslumaður endurnýjaði rekstrarleyfi Goldfinger en ákyktaði jafnframt að ekki væri pólitískur vilji til þess að í Kópavogi færi fram nektardans.  Bæjarfulltrúar Samfylkingarinnar tóku auðvitað undir þau sjónarmið, en hefðu viljað láta reyna á lagabókstafinn og hafna því alfarið, því greiddum við atkvæði gegn jákvæðri umsögn bæjarráðs, en lögðum fram tillögu um að hafna leyfinu. Hún var felld.

Íbúalýðræði og skipulagsmál
Nokkuð var rætt um íbúalýðræði í kjölfar háværra mómæla  bæjarbúa vegna nokkurra mála sem hafa verið í deiglunni undanfarið.  Þrenn íbúasamtök hafa verið stofnuð á kjörtímabilinu, til viðbótar þeim sem fyrir voru í bænum og hafa þau öll það markmið að berjast gegn fyrirhugaðri þéttingu byggðar á svæðum þar sem umferð og umhverfi ber ekki slíka þéttingu.  Má í því sambandi benda á að Kópavogsbær er með kynningu á breyttu svæðisskipulagi á Kársnesi í Kársnesskóla næsta fimmtudag kl 20:00.  Fundurinn hefur ekki verið auglýstur rækilega og er fyrirvarinn stuttur, en auðvitað þurfa Kópavogsbúar að mæta á þennan fund og kynna sér þetta gríðarlega stóra mál sem mun hafa áhrif á ásýnd og yfirbragð Kársnessins til allrar framtíðar verði það að veruleika.

Fjármál
Kópavogsbær tók í vor 30 milljóna evru lán til að endurfjármagna eldri og óhagstæðari lán bæjarins.  Nú var verið að samþykkja 15 milljónir evra í viðbót í þessum sama tilgangi.  Þetta þýðir á gengi dagsins í dag rúmlega 6 milljarða lántöku á þessu ári.  Hluti þessa láns mun einnig vera að hagræða eldri og óhagstæðari lánum, en einnig að breyta skammtímaskuldum í langtíma þar sem áætlanir gegnu ekki eftir er varðar skipulag í Vatnenda, Rjúpnahæð og svo auðvitað Glaðheima og á Kjóavöllum.  Áætlanir vegna þessara framkvæmda hafa einfaldlega ekki staðist.

Þróunarsjóður grunnskóla
Tveir skólar hafa á yfirstandandi kjörtímabili sótt um styrki vegna þróunarverkefna í bæjarsjóð Kópavogs.  Verulegur ágreiningur hefur komið upp í bæjarráði og bæjarstjórn um meðferð umsóknanna og Samfylkingin hefur gagnrýnt meirihlutann harðlega fyrir ófagleg vinnubrögð og að jafnræðis hafi ekki verið gætt. Í kjölfarið dustuðum við rykið af gamalli tillögu okkar sem við höfum lagt ítrekað fram er varðar stofnun vísindasjóðs skólanna í bænum.  Í þann sjóð geti leik- og grunnskólakennarar sótt styrk fyrir þróunarverkefnum og nýsköpun í skólastarfi þar sem sérstök stjórn sjóðsins skipuð fagfólki úthlutar styrkjum árlega.  Bæjarstjórn ákveður við gerð fjárhagsáætlunar ár hvert hversu miklu fjármagni verður varið í sjóðinn á ári.  Sjóður sem þessi myndi tryggja sanngjarna og faglega meðferð styrkumnsókna því auðvitað eiga styrkveitingar bæjarráðs vegna nýbreytni í skólastarfi ekki að vera háðar geðþóttaákvörðunum kjörinna fulltrúa.  Meirihlutinn hafnaði þessari tillögu okkar.

Að lokum er minnt á fundi Samfylkingarinnar í Kópavogi sem haldnir eru sérhvert mánudagskvöld kl. 20:30 í Hamraborg 11, 3. hæð. Verið velkomin.

Ráðið í æðstu embætti Kópavogsbæjar án auglýsingar

Á aukafundi í bæjarráði Kópavogs þann 26. júlí samþykkti meirihluti Sjálfstæðisflokks og Framsóknarflokks að ráða í nokkur af æðstu embættum bæjarins án auglýsingar. Um er að ræða innanhúss hrókeringar ásamt nýrri stöðu gæðastjóra bæjarins.

Þetta kemur fram í tilkynningu frá Samfylkingunni í Kópavogi þar segir einnig að fulltrúar Samfylkingarinnar hafi lagt til að umræddar stöður yrðu auglýstar í samræmi við starfsmannastefnu bæjarins og lögum um opinbera stjórnsýslu.

„Þeirri tillögu var hafnað með þeim rökum að hér væri verið að gefa starfsmönnum bæjarins tækifæri til framgangs í starfi. Fulltrúar Samfylkingarinnar bentu á að auglýsing útilokar ekki framgang starfsmanna bæjarins í starfi en tryggir aftur á móti að þeir eigi allir jafna möguleika til þess framgangs en ekki einungis þeir sem meirihlutinn velur sérstaklega," segir í tilkynningunni sem Guðríður Arnardóttir bæjarfulltrúi og oddviti Samfylkingar sendir.

birtist. visi.is

Stúkan fór úr 300 milljónum í 870

"Kostnaður vegna nýrrar stúku við Kópavogsvöll og tengdra framkvæmda var 870 milljónir. Þegar farið var af stað með framkvæmdina árið 2005 var gert ráð fyrir að kostnaður yrði 300 milljónir."

sjá nánar á mbl.is

Ekki tilviljun að breytingar séu kynntar á sumrin

Guðríður Arnardóttir, oddviti Samfylkingarinnar í Kópavogi, segir að það sé ekki tilviljun að skipulagsbreytingar í Kópavogi séu kynntar á sumrin.

,,Það er auðvitað ekki nein tilviljun að flestar meiriháttar skipulagsbreytingar í Kópavogi fari í kynningu á sumrin þegar fólk er í fríi þegar viðbúið er að færri skili inn athugasemdum," segir Guðríður.

Nýjar tillögur um skipulag á Kársnesi verða kynntar íbúum á fundi í kvöld. Formaður Betri byggðar á Kársnesi hefur gagnrýnt tímasetninguna og fundarboðunina.

Guðríður segir að Samfylkingin í Kópavogi leggist ekki gegn því að nýju tillögurnar fari í kynningu enda ekki um lögformlegt kynningarferli að ræða. Kynningunni er ætlað að skapa umræður um málið svo hægt sé að ná fram sátt um framtíðaruppbyggingu svæðisins. ,,Við höfum nægan tíma til að móta hugmyndir um framtíð Kársness í sátt og samvinnu við íbúa."

Guðríður segir nýju tillögurnar vera viðaminni en þær sem lagðar voru til fyrir ári síðan. ,,Það er búið er að taka stórskipahöfnina út en við höfum enn áhyggjur af umferðarmagninu á svæðinu."

,,Gert er ráð fyrir vegtengingu yfir í Vatnsmýri eins og tillögurnar líta út í dag og sú tenging er grundvallaratriði frá okkar bæjardyrum eigi tillögurnar að ná fram að ganga," segir Guðríður og bætir við að henni þykir hugmyndirnar að mörgu leyti spennandi.

birt á visir.is

Nýtt skipulag - blaut tuska framan í íbúa Kársness

Arna Harðardóttir, formaður samtakanna Betri byggð á Kársnesi, segir nýjar skipulagstillögur bæjaryfirvalda í Kópavogi vera blauta tusku framan í íbúa Kársness.

Í kjölfar mótmæla íbúa og ríflega 2000 athugasemda dró Kópavogsbær í fyrra til baka skipulagstillögur sínar varðandi Kársnes. Nýjar tillögur um svæðið verða kynntar íbúum á fundi í kvöld.

,,Tillögurnar slá okkur afar illa," segir Arna en að hennar mati er útgangspunktur bæjaryfirvalda magn frekar en gæði.

,,Gunnar Birgisson sagði að tekið yrði mark á athugasemdum og áhyggjum íbúa og þetta yrði unnið á lýðræðislegum nótum," segir Arna og bætir við að nýju hugmyndirnar taka ekki mið af þeim athugasemdum sem bárust.

Í tillögunum er gert ráð fyrir fleiri íbúðum, fleiri fermetrum undir atvinnuhúsnæði sem leiðir af sér aukna umferð að mati Örnu. ,,Ljóst er að umferð um Kársnesbraut mun aukast um 50% miðað við það sem nú er," segir Arna.

Arna gagnrýnir harðlega tímasetningu kynningarinnar og fundarboðunina sem barst íbúum síðastliðinn föstudag. ,,Fundurinn er boðaður á föstudegi fyrir mestu umferðarhelgi ársins og margir af þeim sökum ekki heima. Þeir fara um eins og þjófar um nóttu og kynna mál þegar fólk er fríi," segir Arna.

Skipulagstillögur um Kársnes voru fyrst kynntar nokkrum dögum fyrir jólin 2006. Í framhaldinu bárust bæjaryfirvöldum athugasemdir og voru tillögurnar lagðar fram að nýju í byrjun júlí í fyrra. Íbúum var gefin frestur til 3. september til að skila inn athugasemdum. Nýju tillögurnar verða því þær þriðju á jafn mörgum árum sem Kópavogsbær leggur fram um svæðið.

Kynningarfundur skipulags- og umhverfissvið Kópavogs um hugmyndir varðandi blandaða byggð í Kársnesi fer fram í nýrri skemmu við Vesturvör 32b í kvöld klukkan 20.

birtist á visir.is